سئوگی یانیغی.............

بیز کتده یاشایارکن هردن اولوردو آتام واقدیکان انزلی شهرینده اره گئتمیش عمی سی قیزی گویچک فاطمادان سوز آچاردی؛چونکو اونلار یئنی یئتمه چاغلارینی بیر حَییت ده یاشامیشدیرلار؛اوزون ایللر اوستون نن کئچمه گینه باخمایاراق گاهدان یولوموز آدی گئدن شهره دوشنده (1)کلیور(کؤلو یئری)(2)نویر(نور یئری)(3)قارویر(قارقو یئری)آدلی محله لری دولانیب بیله سینی آختارارکن عنوانینی اورگنمک ایسته ییردی؛یادیمدادیر بیر یول اوزومو آتاما توتوب گویچک فاطمادان سوروشاندا جوشقولاناراق دئدی عمیم قیزی فاطما عایله نین تک اوشاغی اولاراق یئنی یئتمه چاغلارین نان آناسینین الدن وئرمیشدیر؛علاوه ائله ییردی کی آلتی یئددی یاشیمیزا قدر بیر حَییت ده یاشاییردیق؛سونونجو ایللر عمیم انزلی دنیز قیراغی تورچولوق ایشینده وارانداچاراسیزلیقدان گویچک فاطمانیدا اوزوینن آپارمالی اولموشدور؛1328نجی(گونش) ایللری دئییه بولگه میزقیتلیغا اوغراییب آجلیق ال وئرنده خالخال کند جاماهاتی گیلانا اوز توتاراق قالاننارینی جانینی آجلیق تهلوکه سین نن قورتارماق ایسته ییردیرلر؛هردن گویچک فاطمانین گؤزللیک لرینن دانیشاراق قولاج ساچلی- چاتما قاشلی- آلما یاناقلی-آیاز بوخاق لی اولدوغونو سویله ییردی؛علاوه ائله ییردی کی گویچک فاطما اؤز دورونون اَن گؤزللر گوزلی اولاراق اوچ یوز آلتمیش پارا خالخال ایزلیگین بولگه سی دئییه آدی دیللره دوشموشدور؛امما آتالار دئمیشکن آل تون نان تاخدین اولسادا باختین سن نن دوز دئمه سه خاساباخت اولا بیلمه ییجکسن؛خان زاده و بی زاده لر اوغلان تارگویچک فاطمانین سوراغینا گلیب اوزلرینه عومور گون یولداشی ائله مک ایسته سه لر طالعین ترس گلمه سینن انزلی شهری دئییه بیر عیبه جر کیمسه شانسینا چیخاراق گویچک فاطمانین اوز سئویب و سئچیم حاققینی الین نن آلمالی اولموشدور؛ایللر بویو آتامین تصویر ائله دیگی گویچک فاطما گؤزللیگی منیمده خیالیمین ایپک قات خالچا شکیلینه چئویریلمیشدیر؛گنجلیک دورونه ایاق قویدوقجا گویچک فاطما گوزللیگی سانکی منی ده ایتیردیگیم یئر ملگی دالینجا آختارماغا معروض قویموشدور؛چونکو قارشیما چیخان قیزلاری گؤیچک فاطمانین گؤزللیگینن اولچمک ایسته ییردیم؛آختاران تاپار دئییه آتام نئچه ایل اوخاریدا آدلارینی صادالادیغیم محله لری آختاران نان سونرا نهایت کی قارویر(قارقویئری)محله سینده اوز قانداش کسگینی تاپمالی اولموشدور؛یادیمدادیر بیرینجی دونه آلتمیشدان اوخاری یاشی اولان فاطما عمی قیزینی گورنده ایللر بویو آتامین تصویر ائله دیگی گؤزللیک هله ده اونون سیماسیندا خزله دونموش باغ کیمین اوزونو گؤزتریردی؛آتام اللی ایل آیریلیقدان سونرا ایتگینی تاپسادا من گئت گئده او عایله ده بیرآییری گویچک فاطمانین سئوگی تورونا دوشه رک هله ده وار اؤزومده او محله لرین آختاریجیسی اولموشام ............... ____________________________________________________________________________________ ایضاح: 1-کلیویر(کؤلویئری)انزلی رضوانشهر ورین نن گلنده بیر محله آدیدیر کی کئچمیشده اورایا هند سویلو قاراچی لار گله رک اوتراق ائله ییردیرلر؛ایرضاشاه دورون نن بئله اداره یازی پوزولاریندا محله نین آدینی ت کلیویر یازیرلارکی آنلامسیزدیر 2-نویر(نور یئری)کؤلو یئری محله سین نن انزلی شهرینه ساری ایندی ایسه بیر محله دیرکی چوخ اسکی چاغلاردان کاروان یولو اولدوغونا گوره اورادا صفوی سولاسله سین نن آغا پیر آدلی بیر سئیدین توربه سی اولموشدور؛اوزاق کئچمیشدن یولدان گل گئت ائله یین کیمسه لراو توربه یه اوز توتاراق چیراق زاد قویوب یاندیرماقلارینا گوره اورانیندا آدی نور یئری قالمیشدیر؛تاسوفلر اولسون کو اونوندا آدینی اداری بلگه لرده نویریازیرلار ؛ قارویر(قارقو یئری)نور یئری(نویر) محله سینین گون چیخانا دوغرو مردابا مرداب هنده وری سایلیر کی اوزاق کئچمیشدن اوراقمیشلیک اولدوغونا گوره(قارقو یئری)دئمیش دیرلرکی اورانی دا ترس اولاراق قارویر دئییه یازیرلار