آتامین یورقون باخیشلاری.........

یادیمدادیر 1352نجی ایللری یازین سون آیی اولاراق آتامین دده بابا کندی اَرسین دن گلن کیمسه بیزیم ائوین عنوانین سوروشاندا یئنی یئتمه اولماغیما باخمایاراق یئریدیم قاباغا کی امریزی بویورون خبر گتیرن کیمسه دولوقسوناراق دئدی آتاوین باشی ساغ اولسون باجیسی گول بدن خانیم حیاتینی دَییشیب آتام چول باییرا آدامی اولدیقیچین آغلایا آغلایا کویشه نه قاچدیب کی بو خبری بیله سینه یئتیریم؛امما آغلاماقدان قاش کیرپیگیم دولسادا اوره گیمینن گلمه دی بو آجی خبری آتاما یئتریب اونون کؤرک اورگه نی اینجیتمه لی اولوم؛آخی بیلیرسیز گول بدن بی بی نین آتاما و بیزه اولان محبتی اَن دوم دورو قانداش موناسبتی دی؛آخشام ائوه گلرکن آنا فامیللری یغیشیب آتامی باشا سالدیلار کی عومورلوک قایقی کشی اولان باجیسی حیاتینی دَیشیب و اونلار بیرلیکده ارسین کندینه گتمه لی اولاجاقلار؛؛هر حالدا آتام گئدیب بیر ایستکلی قارداش کیمین دده سی نین بالاسی باجیسی نی سون مزارا تاپشیراندان سونرا قیرخ گون گلن قوناغین قاباغینا چیخیب باجیسینین یئتیم اوشاقلارینا دایاق اولموشدو؛او حادیثه دن سونرا آتام اوزونو حییاتدا یالقیز سانیب هئچ زامان وارلیغیندا او ایتگی نین یئرین دولدورا بیلمه دی؛ اوحادیثه دن قیرخ نئچه ایل گئچندن سونرا بو ایل بایرام عرفه سینده آتام خسته له نیب یورقان دوشه گه دوشنده اوزاقدان یاخیندان گلن ائل تانیش دیل اوجو حال سوروشوب الله شفاسین وئرسین دئییه ائولرینه گئدنده آتامی درد سیخاراق داها اوزونو آدامسیز حساب ائله ییب هردن گؤزون آچیب اومودوسوز باخیشلارینان منه باخاندایئدی قاتیما کیمین یاندیریب یاخیردی؛نهایت گئچن گون گول بدن بی بی نین اری اولندن سونرا خارابا قالیقلاریندا تک باشینا یاشایان گلینی فریده خانیم زنگ آچیب بایرام گونلرینی بیزه تبریک دئیینده تلفونو آلیب علاوه دن های هاینان آغلایاندا دئدیم گول بدن بی بی نین گؤزوندن ایراق آتام خسته له نیب هر آن یورقون باخیشلارینان منه باخاندا سانکی اوز قانداش ائل طایفاسینی مندن طلب ائله ییر...................... _________________________________________________________________________________ *ارسین کندی-خالخال خان اندبیل بولگه سینه باغلی آتامین دوغمالارینین یاشادیقلاری کندینین آدیدیر *گول بدن بی بی–آتامین آتادان بیر باجیسی نین آدی اولموشدور کی اونلارین باجی قارداشلیق موناسیبتلری ائل ایچینده دیللر ازبری اولموشدور *فریده- گول بدن بی بی نین اوچونجو گلینی دیر کی حیات یولداشی اولندن سونرا کند خارابا داملاریندا تک باشینا یاشاییر؛ آلینمامیش قیصاص............................