سنی آختاریرام.................

ساخت وبلاگ

حؤکمعلی کیشی نن گول بدن خانیم؛ کد یئرینده بیر خوش باخت عایله اولاراق دؤرد اوغول آتاسی  اولان حؤکمعلی قیز یانیغی اولان کیمین  بئشینجی دونه حییات یولداشی اوشاغا قالاندا بیر آلا گوزلو قیز اوشاغی دونیایا گتیریر؛ حوکمعلی یه خبر آپاران کیمسه کی آی *آدی موشتولوغوم وئرکی قیزین اولوب؛اودا خوش گلیب دِئییه بئش تومن اونا وئررک ؛ائله بو سوزه اویقون قیزیندا آدینی خوشقدم قویورلار؛دؤرد قارداشین بیر باجی سی اولاراق کؤرپه خوشقدمین نازینی چکن آناسی اوغلانلارین هره سینه بیر آیاما آد وئررک نه بیلیم بیرینه *کولفه بیرینه  پیلته بیریسینده چیراغ صادالایاندا یاشایشلارینین شیرینلیگی اولان بالالاری اونلارین داها گووَنج یئرینه دونموشدی؛ائل طایفا نازینان بویا باشا چاتان خوشقدم  قیزلار بیلاغیناندان سو ایچیب اوز گوزلیگینن ساییلیب سئچیلرکن آدی دور برگوزلرینین سیراسینا دوشنده مین یئردن آخین ائله ییب گلن ائلچی قیزآتاسی نین قاپیسینی دوینده طالع خوش گتیرن کیمین نهایت  قونشو کدده هانپا شیرینعلی اوغلو علی نن آداقلانیب ایل یاریم سئویشیب آداقلی قالماق لارینا باخمایاراق بیر ایل یاز قاباغی گیلاس آلبالی چیچکلری چیتدایان چاغدا سگیز دوه یوکو جییز قوشاراق آتا بابا قایدا قانون ایلا قیزی کوچوروب اوغلانی  طایفاسیندا اوز ائل اویماقلارینا بیر آرخا کیمین علاوه ائله ییرلر؛خوشقدم گئتدیگی عایله ده اوز تای توشلارینا رغمن  بیر ایاغی دوشرلی گلین کیمین یاشاییب گئد گئده ایلک قارنینا بیر اوغلان اوشاغی دونیایا گتیرنده داها اَر طایفانین گوزونده خییر برکت رمزی اولاراق سو الهه سینه دونور؛واوشاق گلمه یینن اوز یاشایشی لاریدا شیرین له شن کیمین حییاتدا گومراه لیقینان گئچن عومورگونلرین بیلمه ییرک؛ یئدی سگیز ایلین ایچینده عایله لرینه اوچ دورد اوشاق دا علاوه اولور؛داها کروان یوکون باغلایان کیمین اَر آرواد اورتا یاشلارینا ایاق قویوب  آهیل آق بیرچک کیمین یاشا دولورلار؛گاهدان عایله وی گئت گلیمیزده گوروردوم کی *علی یئزنه خوشقدم بی بی یه اوز توتوب فرج آدینان بیله سینی سسله ینده آتامین گوزلری دولوب اؤزلریده چوخ کدرله نردیلر؛آخی بیلیرسیزبویوکلره حؤرمت اولاراق قدیم کند یاشاشیندا گلین اوتاندیقینان اوز حییات یولداشی نین آدین دیلینه گتیره بیلمه ینده نه بیلیم اوشاقلارینین آدینان بیله سینی صادالایاردی؛منیم عالمیمده خوشقدم بی بی گوزلیگیندن علاوه بیر شان شاققراق و دِئییب گولن قادین اولسایدیدا؛ امما اونون جوت گؤز کیپریکلرینده بیر آغیریوک اولاراق قیش قیرووی آسلانمیشدی؛داها دوغروسو من گنج یاشلاریما کیمین بوسیررین قاپالی اولدوغونو باشا دوشنده بئله معلوم اولدوکی اوره یی محببت له دولو اولان خوشقدم بی بی نین فرج آدلی بیرگنج اوغلو ایران اینقلاب عرفه سینده باش کتده ایشله یرکن یوخا چیخمیشدیر؛ائله بونا گؤره علی یئزنه ایمکانی قَدَرمال قاراسیندان ساتیب ایللر بویی تانیمادیقی ائل اویماغی دولانارکن بالاسینی آختاریب هیچ بیر نیشان اله گتیره بیلمه ینده  اوزون ایللر *حوزه طرفینن گلیب عسکرلیگه آدی چیخان فرجی آتاسیندان طلب ائله یین مامورلارقارشیسیندا ائولرینه ایمام حسین نوصیبتی دوشوب  دولت آدامیدا یازیق قوجا کیشی نی آیلارینان بیرا اورا چکیردیلرکی یوخ اولمازگرک اوغلووی گتیره سن؛ کدده چارخی دوننلر کیمین بیزده آتمیش اینجی ایللرده آتا بابا یوردونان کوچوب انزلی شهرینده مسکونلاشاندا؛داها قونشو کد دوغمالاریندان اوزاقلاشیب من و بالاجا قارداشیم حربی قوللوچو اولاراق ایران عراق محاریبه زامانیندا اوز حشیریمیزه قارق اولان کیمین ایلده بیر یول خالخال کد دوغمالاریمیزا باش ویرا بیلمیردیک؛یادیمدادیر؛سون واقتلار بی بی خسته له نیب اورتانجیل اوغلو علی خاننان بیزه قوناق گلنده بوتون عایله عضوولری عزیز قوناقلاری قاریشیلاماق اوچون گئجه بیر یئره توپلاشیب سوز صوحبت آراسی فرجین آدی گلنده *هاممی کدرله نَرَک خوشو بیر داها آغلایا آغلایا بوینومو قوجاقلاییب وورقولادی بو اولور گونومده فرجین اؤلوب و یاخود دیری اولماسینی سندن ایسته ییرم؛منده او چاغدان بری بی بی نین گوز یاشلارین خاطیرلاییب ایتگین بالاسینی سوراقلایاراق عایدات قوروم ایداره لرینه موراجعه ائله ییب ثبت احوال دان توتموش اینظیباطی پولیس ایداره سینه کیمین عریضه لر یازیردیم کی بلکه بیر نیشان الده ائلییه بیلیم ؛بو ایشین اوستوندن بیر آز موددت گئچندن سونرا من آفتاموبیل قضاعرفه سینده زیندان دوشوب اوزون بیر واقت حبس چکندن سونرا نهایت کسیلن جزانی قوتاریب عایله مه اوز توتاندا بئله معلوم اولدوکی سون نفسینده ارزاییل دان بالاسی نین نم نیشانین ایسته یین آنا دونیاسینی دَیشیب؛اوزو قارالیقینان بیرگون یوخون قوهوم اقربه  نی گؤتوروب مزاری اوسته گلنده  گوردوم؛بی بی نین باش داشی اوسته  اوغلو فرجین شکیلینی اوز قوجاغیندا توتاراق آلتیندا آنا دیلینن یازمیش لار کی سنی آختاریرام ..................................

ایضاح:داها دوغروسوبو اولای بیزیم طایفا ایچینده ایتفاق دوشموش بیر حیکایه دیر کی یازدیم ؛اصلینده خوشقدم آتامین دوغما دوغار باجیسی  خالخال خان اندبیل بولگه سی ارسین کندینده یاشایان گول بدن بی بی نین قیزدیر بیز او رحمتدیک (خوشقدمی) اوز عایله میزایچره بی بی چاغیراردیق

*دوز آدی مئشه حکم اله اولان گول بدن بی بی نین حیات یولداشی نین آدینی بو حیکایه ده من حکمعلی یازدیم  

*آدی- مئشه  حؤکم اله نین ائل آراسیندا چاغیریلان آیاماسی اولموشدور

*کولفه-کند ائولرینده تندیره آچیلان هاواکش دئمکدیر

*علی علیزاده -خوشقدم بی بی نین حییات یولداشی اولاراق بیز اونو ائل آراسی یئزنه چاغیراردیق

*حوزه-ایراندا عسکرلیگه چاغیریلان گنج اوغلان اوشاقلارینی حربی قوللوغونا جلب ائله یین بیرایداره نین آدی دئمکدیر  

*خوشو –خوشقدم سوزونون قیسسالمیشی دئمکدیرکی اوز اوشاقلاری اونو بو آدلا چاغیراردیلار   

آلینمامیش قیصاص............................
ما را در سایت آلینمامیش قیصاص......................... دنبال می کنید

برچسب : نویسنده : tungal92 بازدید : 268 تاريخ : جمعه 12 خرداد 1396 ساعت: 23:25